Пачынаючы з 2000 года ва ўсім свеце 21 лютага адзначаецца Міжнародны дзень роднай мовы. Сёння ў свеце шмат цудоўных моў, але ў кожнага чалавека ёсць толькі адна родная мова.
У чытальнай зале Камянецкай раённай бібліятэкі ім. У.М. Ігнатоўскага разгарнулася выстава “Са слова пачынаецца Радзіма”. Выказванні выдатных прадстаўнікоў беларускай літаратуры: Я. Коласа, П. Панчанкі, М. Танка, акцэнтавалі ўвагу і заклікалі любіць, шанаваць і ўжываць мову продкаў.
Чытачам прапанаваліся для знаёмства паэтычныя радкі класікаў, сучаснікаў і землякоў З.Бядулі, Я.Янішчыц, Н.Гарагляд, Н.Нарэйкі і інш., якія сваёй творчасцю ўслаўляюць родную мову.
На працягу дня раздаваліся інфармацыйныя флаеры з гісторыяй узнікнення знамянальнай даты і шэрагам вершаў, раскрываючых прыгажосць і непаўторнасць роднай мовы.